Австралија би можела да стане првата држава на светот кој во целост ќе го искорени ракот на грлото на матката, соопшти Меѓународното здружение за борба против папилома вируси.
Ново истражување, чии резултати се објавени во неделата, покажува дека програмата за бесплатна вакцинација, која се спроведува од 2007 година во Австралија, довела до драстично намалување на можноста за развој на овој вид на рак во иднина.
ХПВ е сексуално пренослива инфекција која претставува причина за рак на грлото на матката, во 99,9 отсто од случаите.
Сојузната влада на Австралија, од 2007 година спроведува бесплатна програма за вакцинација на девојчиња на старост меѓу 12 и 13 години. За девојките и младите кои се надвор од таа старосна група, обезбедени се две бесплатни дози на вакцини.
Процентот на жените во Австралија меѓу 18 и 24 години кои имале ХПВ значително опаднал, односно во периодот од 2005 до 2015 година, од 22,7 се намалил на само 1,1 отсто.
Стапката на имунизација уште се зголемила од 2015 година, што е причина за она што научниците го опишуваат како ефект на „заштита на популацијата“.
Здравствената состојба, кога е ХПВ во прашање, е лоша во земјите во развој, каде стапката на заболени е многу висока.
„Две третини од женската популација во светот немаат пристап до она што го имаат жените во Австралија. Ако не се направи нешто на тој план, тоа ќе остане еден од најопасните видови на рак во земјите во развој“, вели Џо Тума, извршен директор на Австралиската фондација за борба против рак на грлото на матката.
Иако давањето на бесплатни вакцини се чини како скапа мерка, австралискиот пример докажува дека вакцинацијата би можела да ги намали трошоците кои подоцна ќе настанат при лечење на овој вид на карцином.
