Австралија од септември се соочуваше со суша и страшни пожари кои беше тешко да се стават под контрола и се чинеше дека само дождови може да помогнат во справувањето со огнената стихија.
Громови и поројни дождови денеска погодија делови од источниот брег на Австралија, а поради поплавите затворени се одредени главни патни правци.
Во исто време, во делови од Австралија, каде не врне дожд, сѐ уште се активни 100 пожари во кои загинаа 29 луѓе, а уништени се повеќе од 2.500 домови, а опожарена е површина колку Германија.
Австралиските држави Викторија, Нов Јужен Велс и Квинсленд, кои најмногу беа погодени од сушата и пожарите сега се справуваат со поплави предизвикани од поројните дождови.
Во Квинсленд затворени се патишта, како и многу паркови и туристички атракции. Додека невремето во делови од Нов Јужен Велс предизвика прекин во снабдувањето со електрична енергија, а противпожарната служба соопшти дека поројниот дожд помогнал да се стават под контрола 75 пожари.
Во Викторија сѐ уште горат десетина пожари, но е анулирана наредбата за евакуација на жителите во планинскиот предел. И во таа сојузна држава дождот помогна во гаснење на пожарите, но се создаде густ чад, што би можел да влијае врз одржувањето на последното коло од тениските квалификациските натпревари на Австралија Опен.
Силите за одбрана на Нов Зеланд соопштија дека во Австралија се распоредува засилување од странски земји, а се очекува наскоро да се приклучат и специјалци од Јапонија и САД.