Австрија денеска соопшти дека планира до август да испрати 651.000 дози од вакцината на Pfizer во шест земји од Западен Балкан, како дел од програмата на Европската унија.
Тие ќе бидат дистрибуирани од почетокот на мај според тоа на кои земји им се најпотребни. Босна и Херцеговина ќе добие најголем дел од вакцините – 240.000 дози, следена од Албанија 145.000 и Северна Македонија 119.000. Србија ќе добие 36.000 дози.
Европската комисија во јануари ги објави плановите за механизам за споделување вакцини. Австрија рече дека ќе дејствува како координатор на механизмот за Западен Балкан и дека по првата распределба на дозите може да следува и втора.
– Со оваа иницијатива покажуваме дека не го оставаме регионот настрана, изјави австрискиот министер за надворешни работи Александар Шаленберг на прес-конференција.
Австрија посредуваше во договорите меѓу Pfizer и земјите приматели, соопшти Министерството за надворешни работи и најави дека исплатата на овие вакцини е 11 милиони евра. Дозите на вакцини ќе се плаќаат од средства за помош на ЕУ или потенцијалните земји кандидати.
– Ова не е поврзано со набавка на вакцини во Австрија и другите земји-членки на ЕУ, рече Шаленберг, чија влада се справува со растечката јавна фрустрација поради бавната вакцинација.
– Овие дози не доаѓаат од националната квота. Ова се дозите што ЕУ експлицитно ги зачува на почетокот со цел да им ги испрати на своите партнери, потенцираше австрискиот министер.
