Во Австрија е на сила строг локдаун поради коронавирусот. Но, политичарите на еден настан не ги почитуваа мерките, што предизвика остри критики кај граѓаните.
Додека е на сила локдаунот за граѓаните во Австрија, јавниот сервис ORF емитуваше во живо хуманитарна емисија „Светлина во темнината“, во која учествуваа политичари кои беа без маски и не ја одржуваа пропишаната дистанца, поради што наидоа на остри критики.
Фотографиите по шоуто предизвикаа бројни дискусии, поради што од кабинетот на канцеларот Александар Шаленберг, кој е една од метите на критики, соопштија дека сите учесници направиле валиден ПЦР тест и дека немало никаква журка.
Меѓу учесниците на шоуто, покрај Шаленберг, беа и претседателот на Австрија, Александар ван дер Белен, и вицеканцеларот Вернер Коглер.
Шефот на Партијата на слободата на Австрија (FPO) во Виена, Доминик Неп, истакна дека шоуто на ORF е „симбол на бескрупулозно однесување“.
„Ако владата е толку глупава да прави журка пред милионска публика, тогаш не треба да се чудиме кога граѓаните ќе излезат на улица“, рече тој.
Од ORF соопштија дека од таа емисија се собрани 3,3 милиони евра, дека се почитувани сите безбедносни мерки и дека по снимањето немало журка, на што можеби укажувале одредени слики.
