BMW започна глобална акција за повлекување автомобили од неколку модели - засегнати се околу 575.000 возила, според весникот kfz-Betrieb.
BMW официјално не ја потврди бројката од 575.000, но соопшти дека станува збор за „средна шестцифрена бројка“, а во Германија биле засегнати 28.582 автомобили.
Според компанијата, за време на контролата на квалитетот, утврдено е дека по голем број стартувања на моторот, може да се појави зголемено абење на магнетниот прекинувач во стартерот. Како резултат на тоа, возилото може да има тешкотии при стартувањето, а во некои случаи може воопшто да не може да стартува.
Исто така, не може да се исклучи можноста за краток спој, што може да предизвика локално прегревање на стартерот.
„Во најлош случај, може да доведе до пожар на возилото при возење. Во таква ситуација, може да се забележи или почувствува чад при возење или при напуштање на возилото“, соопшти BMW, цитиран од германскиот весник Bild.
Затоа, компанијата препорачува да не се остава возилото без надзор со вклучен мотор.
Поточно, станува збор за модели од серијата 2 Coupe, одредени верзии од сериите 3, 4 и 5, потоа 6 Gran Turismo, седаните од серијата 7, како и моделите X4, X5, X6 и Z4.
Проблемот ги засега возилата со start reley произведени помеѓу јули 2020 и јули 2022 година.
Не е можно прецизно да се утврди точниот период на производство на самите автомобили, бидејќи стартерите биле складирани различно време пред инсталацијата. Покрај тоа, погодени биле и возилата на кои подоцна им бил вграден неисправен стартер за време на поправката.
Сопствениците може да проверат на официјалната веб-страница на BMW дали нивното возило е опфатено со повлекувањето со внесување на бројот на шасијата (VIN).
