Aston Martin е во финансиска криза, а Geely се споменува како можен купувач на британскиот бренд.
Aston Martin повторно е во тешка финансиска состојба, а во Велика Британија расте загриженоста дека легендарниот производител на спортски автомобили би можел да заврши во кинески раце.
Британската компанија, која постои повеќе од еден век, банкротирала дури седум пати во текот на својата историја.
Само пред неколку недели, таа беше принудена да земе итен заем од 46 милиони евра, поддржан од конзорциум предводен од милијардерот и претседател на компанијата Лоренс Строл.
Откако излезе на берза, вредноста на Aston Martin падна за околу 90 проценти, а британските медиуми објавуваат дека сè повеќе се поставува прашањето колку долго Строл ќе продолжи да ја финансира компанијата.
Кинескиот гигант Geely, кој веќе поседува околу 14 проценти од акциите на Aston Martin, привлекува посебно внимание.
Во британската автомобилска индустрија се зголемуваат шпекулациите дека Geely би можел да стане главен купувач доколку Строл одлучи да се пензионира.
Британците стравуваат дека Aston Martin би можел да ја доживее судбината на брендот MG Motor, чие производство практично беше преместено во Кина.
Дополнителна загриженост предизвикува примерот на Lotus, кој откако беше преземен од Geely, префрли дел од производството на електрични модели во Вухан, Кина.
Експертите предупредуваат дека Кина нуди значително пониски трошоци за производство, поради што преместувањето на производството би можело да биде логичен бизнис потег.
За британската влада, ова е многу чувствително прашање, бидејќи губењето на контролата врз уште еден легендарен бренд на автомобили би бил сериозен удар за домашната индустрија.
А идејата Џејмс Бонд еден ден да вози „кинески“ автомобил сè уште им изгледа незамисливо на многумина во Британија.
