Samsung Electronics објави дека почнувајќи од јули нивната апликација Wallet ќе поддржува дигитални клучеви за возила од германскиот производител на автомобили Mercedes-Benz.
Благодарение на новата интеграција, корисниците на голем број паметни телефони Samsung Galaxy ќе можат да ги заклучуваат, отклучуваат и стартуваат своите модели на Mercedes-Benz користејќи ги своите паметни телефони. Автомобилот препознава уред во близина користејќи Ultra-Wideband (UWB) или NFC технологија. Клучот може безбедно да се сподели со пријателите и семејството, а пристапот може да се оневозможи доколку е потребно.
Дигиталниот клуч е зачуван во Samsung Wallet и е заштитен со безбедносниот стандард EAL6+ и протоколот Samsung Knox.
Доколку корисникот го изгуби својот паметен телефон или му е украден уредот, клучот може да се избрише или блокира преку услугата Samsung Find.
Пристапот до автомобилот бара верификација преку биометрија или ПИН код.
Корисниците можат да го регистрираат својот дигитален клуч преку апликацијата Mercedes me.
Поддржани уреди се: Galaxy S21 Ultra/S21+, S22 Ultra/S22+, S23 Ultra/S23+, S24 Ultra/S24+, S25 Ultra/S25+, S25 Edge, Z Fold3, Z Fold4, Z Fold5, Z Fold6 и Z Fold Special Edition.
Поддршката за дигитален клуч за моделите на Mercedes-Benz варира во зависност од регионот. Поддржаните региони се: Абу Даби, Австралија, Австрија, Белгија, Бугарија, Германија, Данска, Дубаи, Естонија, Јужна Африка, Јужна Кореја, Канада, Кипар, Литванија, Луксембург, Малезија, Мексико, Нов Зеланд, Норвешка, Обединетото Кралство, Полска, Португалија, Романија, САД, Сингапур, Словачка, Словенија, Тајван, Тајланд, Финска, Франција, Холандија, Хрватска, Чешка, Швајцарија, Шведска и Шпанија.
