Новите автомобили со мотори со внатрешно согорување ќе може да се регистрираат во Европската Унија по 2035 година, според најновите информации што ги споделија официјалните лица.
При повторното оценување на граничните вредности на емисиите за возниот парк, ЕУ ќе ги земе предвид „сите технолошки достигнувања“, вклучувајќи ги и новите автомобили што имаат мотори со внатрешно согорување на е-горива и биогорива, изјави комесарот за транспорт Апостолос Цикикостас во интервју за германскиот весник Handelsblatt.
Оваа мерка треба да стане дел од „Автомобилскиот пакет“, со кој Комисијата на ЕУ сака да ја зајакне автомобилската индустрија и да обезбеди европска конкурентност.
За корпоративните возни паркови, Цикикостас вели дека ќе се воведе правило „Купувајте европски“, а Европската Унија сака да промовира и попристапен модел на почетно ниво што треба да ја зголеми побарувачката за електрични автомобили.
Да потсетиме дека првичната одлука за забрана на моторите со внатрешно согорување во ЕУ по 2035 година беше донесена како дел од Регулативата на ЕУ за граничните вредности на емисиите на CO2.
Сепак, многу производители (од кои најгласните се германските) беа за постигнување договор со кој автомобили со хибриден погон или електрични автомобили со продолжувач на домет (range extender) би можело да се регистрираат и по 2035 година.
Станува збор за возила што работат главно на електрична енергија, но имаат и мал мотор со внатрешно согорување како помошен генератор. Сè уште не е јасно што ќе се случи со тој предлог, односно дали ќе биде прифатен или не.
