Иако Volvo неодамна се откажа од своето ветување да произведува само електрични возила до 2030 година, извршниот директор Хакан Самуелсон останува убеден дека иднината на автомобилската индустрија им припаѓа на електричните возила.
„Индустријата ќе биде електрична - нема враќање назад. Во некои региони можеби ќе потрае малку подолго, но насоката е јасна. За околу 10 години, автомобилите ќе бидат целосно електрични и ќе бидат поевтини“, изјави 74-годишниот Самуелсон за Bloomberg.
Интересно е што Volvo забележа пад од 24 проценти во продажбата на електрични возила во првите осум месеци од оваа година. Сепак, Самуелсон верува дека компанијата може да се опорави со нови plug-in хибриди, кои ги опишува како „електрични автомобили со резервен мотор“.
Извршниот директор предвидува големо реструктуирање на автомобилската индустрија до 2035 година, кога „два или три многу силни кинески брендови“ ќе доминираат на пазарот, додека традиционалните производители ќе мора да се прилагодат на новата реалност.
За разлика од Volvo, производителите како BMW, Mercedes, Audi и Porsche се скептични во врска со целосен премин кон електрични возила до 2035 година, кога ЕУ планира да ја забрани продажбата на нови автомобили со мотори со внатрешно согорување.
