Кинескиот производител на електрични возила BYD соопшти дека неговиот профит нагло се намалил во вториот квартал поради жестоката ценовна војна на домашниот пазар.
Во периодот април-јуни, приходите на BYD изнесувале 201 милијарда јуани (28,2 милијарди долари), што е зголемување од 14 проценти во однос на претходната година, покажуваат податоците.
Нето добивката се намалила за 30 проценти на 6,4 милијарди јуани.
Кинескиот сектор за електрични возила ги чувствува ефектите од „засилената“ ценовна конкуренција, објасни менаџментот на BYD во бизнис извештај.
Конкуренцијата во кинескиот автомобилски сектор достигна врв, додадоа тие.
Просечната цена на автомобил во Кина опаднала за околу 19 проценти во последните две години и моментално изнесува околу 165.000 јуани (23.100 долари), според проценките на индустријата, според BBC.
BYD се натпреварува во Кина со домашни конкуренти како што се Nia и XPeng и со американскиот Tesla, а поради нивната жестока борба за клиенти, кинеското Министерство за трговија објави построги упатства за конкуренција во автомобилскиот сектор кон крајот на мај за да ја ублажи ценовната војна што им се закануваше на дилерите и добавувачите и создаде загуби во секторот како целина.
Здружението на дилери предупреди дека производителите треба да ја усогласат понудата со побарувачката и да ја прекинат практиката на префрлање на вишоците во салоните за автомобили.
BYD крена прашина на пазарот со вклучувањето на системот за помош при возење God's Eye како стандардна опрема на сите модели и воведувањето нова технологија за ултрабрзо полнење на електрични возила.
Овие потези ги охрабрија конкурентите како што се Leapmotor, Geely и Toyota да го следат примерот, а исто така да им понудат на клиентите попристапни модели со „паметни“ карактеристики.
Управата на BYD планира да продаде 5,5 милиони автомобили оваа година, но до крајот на јули беа продадени само 2,49 милиони.
Во 2024 година, кинескиот гигант произведе најмногу електрични возила во светот, надминувајќи ја по приходи американска Tesla.
