Кинескиот бренд сè уште не ги откри деталите за погонскиот склоп за својот футуристички пикап.
Tesla Cybertruck сè уште се смета за најнеобичниот пикап на пазарот, но кинескиот GAC има нов адут што може сериозно да го загрози - и по цена и визуелно.
Нивниот модел, наречен Pickup 01, првпат беше прикажан како концепт на Шангајскиот саем за автомобили, а сега е официјално потврдено дека влегува во сериско производство и ќе биде достапен на глобалниот пазар.
Сериското производство е закажано за 2027 година, а GAC истакна дека Pickup 01 нема да биде ексклузивен производ за Кина.
Според информациите од порталот Autohome, GAC планира да го пласира овој модел на пазарот во Австралија, Саудиска Арабија, Чиле, Мексико и други земји каде што веќе е присутен.
Оваа кинеска државна компанија, која има заеднички проекти со Toyota и Honda, сè уште не ги откри техничките спецификации на погонскиот систем.
Концептот изгледа како комбинација од Cybertruck на Tesla и новиот GMC Hummer EV со остри линии што го издвојуваат меѓу морето кинески пикапи.
Сè уште не е јасно колку серискиот модел ќе личи на концептот, но се претпоставува дека нема многу да отстапува од него.
Доколку сериската верзија остане верна на концептот, фокусот ќе биде на теренските можности, со висок клиренс, куки за влечење и уникатни тркала.
Концептот има и две LED светлосни ленти над шофершајбната, како и камери наместо класични ретровизори.
Се очекуваат значајни промени во кабината. Имено, концептот има волан поставен на шина што овозможува да се движи од левата кон десната страна, што би го олеснило креирањето верзии за различни пазари, но таквото решение тешко дека би ги поминало безбедносните стандарди.
Сепак, некои карактеристики од концептот би можело да се задржат и во сериската верзија, како што се широкиот екран за инфозабава и минималистичкиот дизајн на ентериерот.
