Tesla Model S и Model X, автомобили кои некогаш поставуваа стандарди во индустријата за електрични возила, полека стануваат фуснота во историјата на компанијата.
Американскиот производител штотуку ја прекина можноста за нарачка на овие два модели во Европа, што може да биде знак за нивно целосно затворање, пишува Insideevs.
Купувачите во Европа повеќе не може да нарачуваат нови Tesla Model S и X според сопствените желби. Американскиот производител на електрични автомобили одлучи да ги суспендира нарачките и овие некогаш водечки модели ќе се продаваат исклучиво од постојните залихи. Одлуката доаѓа откако Tesla веќе го прекина производството на овие модели за пазарите со волан од десна страна, како и за Кина.
На својата европска веб-страница, Tesla го отстрани конфигураторот за нарачка на нови возила, оставајќи им на клиентите само можност да купат Model S или X од залиха. Овој потег доаѓа откако компанијата престана да произведува верзии со волан од десна страна во 2023 година, а претходно оваа година ги прекина и во Кина. Ова ги остава Европа и Северна Америка како единствени големи пазари за дуото.
Сега кога Европа е надвор од играта, САД и Канада остануваат единствените големи пазари каде што овие сега донекаде застарени електрични автомобили се уште се достапни. Интересно е што Tesla ги освежи Model S и Х претходно оваа година со амбиентално осветлување во повеќе бои и неколку други мали измени, но во исто време ги зголеми цените, што предизвика незадоволство кај обожавателите на брендот.
На пример, германската веб-страница на Tesla ги пренасочува корисниците кон список на возила на залиха за Model S, но проблемот е што во моментов нема такви достапни во Германија. Додека освежувањата на моделите обично служат за привлекување нови клиенти, тешко е да се замисли како тоа ќе се случи сега кога Тесла практично се откажа од Европа. Без никакви значајни надградби, компанијата се чини дека се откажа од своите оригинални, престижни модели.
Купувачите се свесни за ова, а бројките на продажбата го потврдуваат тоа. Во последните неколку години, податоците за Model S и Model Х се групирани заедно со Cybertruck и камионот Semi во категоријата „Останати модели“ во рамките на извештајот за производство и испораки. Во првата половина од оваа година, Tesla испорача само 23.275 возила од таа категорија, додека Model 3 и Y забележаа речиси 700.000 испораки низ целиот свет.
Сите индикации се дека Model S и Model X се приближуваат кон крајот на своето патување и веројатно е само прашање на време кога Tesla целосно ќе ги повлече од производство. Со неодамнешното лансирање на Model Y со три реда седишта во Кина, значително поскапиот Model X стана тешко да се оправда за просечниот купувач, додека подеднакво скапиот Model S за жал денес стана нишен производ.
