Германскиот производител на спортски автомобили Porsche објави остар пад на профитот во првиот квартал, со слаби резултати во Кина и повисоки трошоци. Во периодот од јануари до март, приходите на Porsche изнесуваа 8,86 милијарди евра, што е намалување од 1,7 проценти во однос на истиот период минатата година.
Оперативниот профит, сепак, се намали за 40,6 проценти на 760 милиони евра.
„Како што очекувавме, првиот квартал беше послаб“, рече главниот финансиски директор на компанијата, Јохен Брекнер. На почетокот на април, компанијата објави дека испорачала 71.470 возила во периодот од јануари до март, што е осум проценти помалку отколку на почетокот на минатата година.
Продажбата во Кина се намали за 42 проценти, а на европскиот пазар исто така се намали за 10 проценти. Испораките во Северна Америка скокнаа за 37 проценти, со продадени 20.698 возила, делумно одразувајќи ја ниската компаративна основа на почетокот на минатата година поради проблеми со увозот.
Вчера, компанијата ги намали своите прогнози за целата година, наведувајќи ги повисоките трошоци за производство на батерии, програмата за реструктуирање, новите американски царини и континуираните лоши резултати на кинескиот пазар.
Менаџментот сега очекува 1,3 милијарди евра вонредни трошоци оваа година, 500 милиони повеќе отколку што предвидоа. Само во првите три месеци од оваа година, трошоците за „некои проекти“ достигнаа 200 милиони евра, изјавија тие.
„Решително инвестираме во иднината на Porsche, во производи, софтвер и мерки со кои сакаме да ја зајакнеме одржливоста на компанијата и да се позиционираме цврсто за иднината“, рече Брекнер.
Во февруари, менаџментот објави дека ќе намали околу 1.900 работни места во главната фабрика во Штутгарт и во развоен центар во Вајсах до 2029 година. Исто така, објави стратешка промена и зголемени инвестиции во хибриди и модели со мотори со внатрешно согорување.
Менаџментот во моментов ги базира своите прогнози на претпоставката дека зголемените американски царини ќе стапат на сила во април и мај. Дополнителни трошоци се создаваат поради одлуката за суспендирање на плановите за независно зголемување на производството на високо-перформансни батерии во нивната подружница Cellforce.
Во такви околности, тие ја намалија својата годишна проценка на приходите од 40 милијарди на 37 до 38 милијарди евра. Во 2024 година, тие изнесуваа 40,1 милијарди евра, што е намалување од 1,1 процент во однос на 2023 година.
„Макроекономската ситуација ќе остане предизвикувачка и не можеме целосно да ја избегнеме, но можеме да направиме сè што е во наша моќ да се подготвиме за такви услови“, рече финансискиот директор.
Слабите резултати на кинескиот пазар продолжуваат да влијаат силно врз компанијата, која очекува да потроши повеќе за да ја поддржи својата мрежа на добавувачи. Германскиот производител на луксузни автомобили беше особено силно погоден од тензиите во трговските односи меѓу Кина и Европската Унија.
Брисел минатата есен воведе дополнителни тарифи за увоз на електрични автомобили од Кина, а Пекинг посочи дека може да одговори со зголемување на тарифите за бензински седани и теренски возила со мотори поголеми од 2,5 литри. Кина учествува со една четвртина од глобалната продажба на Porsche.
