Porsche го продолжи низот рекорди со Taycan Turbo GT кој постави нови времиња за најбрз сериски електричен автомобил на две познати патеки.
Porsche навистина има фетиш за рекорди. Не нè чуди тоа кога знаеме колку вложува во возачките потенцијали на возилата. Најновите успеси доаѓаат од две патеки. На патеката Road Atlanta во Џорџија професионалниот возач Патрик Лонг постави ново рекордно време од 1:27.1 минути на 4,088 км долга патека, што е за повеќе од шест секунди побрзо од претходниот рекорд на Taycan Turbo S од 2020 година.
Во Абу Даби, на патеката Yas Marina Circuit од Формула 1, возачот Рамез Азам го сруши рекордот со време од 2:07.2 минути на 5,281 км долга патека, само 1,1 секунда побавно од рекордот за touring автомобили. Возењето беше реализирано ноќе поради екстремно високите дневни температури.
Двата рекорда се постигнати со Taycan Turbo GT опремен со Weissach пакетот, најмоќниот сериски Porsche што некогаш бил произведен, кој развива повеќе од 1.100 КС во Attack мод.
Овие успеси ја продолжуваат серијата рекорди на Taycan Turbo GT кој веќе постави рекорди на Интерлагос, Shanghai International Circuit, Laguna Seca и легендарниот Нирбургринг каде постави време од 7:07.5 минути, дури 26 секунди побрзо од претходниот рекорд.
Моделот користи напредна Porsche Active Ride суспензија и интелигентна лесна конструкција која е за 75 кг полесна од моделот Turbo S. Нема сомнеж дека приказните со рекорди ќе продолжат да пристигаат од Porsche.
