Volkswagen во својот извештај соопшти дека имало нов пад на профитот во првиот квартал од 2026 година, откако послабата продажба на клучните пазари и континуираните предизвици во индустријата го оптоварија најголемиот европски производител на автомобили.
Нето добивката падна за 28,4 проценти на годишно ниво на 1,56 милијарди евра во периодот јануари-март, соопшти германската компанија. Една година претходно, Volkswagen забележа профит од 2,19 милијарди евра, што веќе претставуваше пад од 41 процент во споредба со претходната година.
Приходите паднаа за 2,5 проценти на 75,7 милијарди евра, додека оперативната маржа „се лизна“ на 3,3 од 3,7 проценти една година претходно.
„Војните, геополитичките тензии, трговските бариери, построгите регулативи и интензивната конкуренција создаваат притисок“, рече извршниот директор Оливер Блуме.
Групацијата останува под притисок од слабата продажба во Кина и САД. Глобалните испораки кај сите брендови се намалија за 4 проценти на 2,05 милиони возила, при што падот во тие региони го компензираше растот во Европа.
Заработката беше дополнително намалена од слабите резултати на луксузниот спортски бренд Porsche, каде што нето-добивката се намали за речиси една четвртина, и подружницата за камиони Traton, која објави значителен пад на профитот поради специјални еднократни трошоци.
