Групацијата Volkswagen повлекува речиси 100.000 електрични возила Volkswagen и Cupra поради проблеми со високонапонските батерии што може да предизвикаат пожар, соопшти Германската федерална управа за моторен сообраќај (KBA).
Извештајот од федералната управа со седиште во Фленсбург наведува низа можни проблеми, од палење на жолто предупредувачко светло и пократки интервали на полнење до потенцијален ризик од пожар. Портпаролот на Volkswagen потврди дека се повлекуваат возила низ целиот свет поради модул на батерија што не ги исполнува техничките спецификации.
Групацијата ги повлекува моделите Volkswagen ID.3, ID.4, ID.5 и ID.Buzz, произведени помеѓу 24 јуни 2023 година и 23 август 2024 година, како и моделот Cupra Born произведен помеѓу 7 февруари 2022 година и 21 април 2024 година.
Вкупно се засегнати околу 94.000 возила, од кои речиси 75.000 се Volkswagen, а повеќе од 19.000 се возила Cupra. Според KBA, поправката на дефектот вклучува ажурирање на софтверот и тестирање на батеријата, а доколку е потребно и замена на поединечните модули на батеријата.
Volkswagen нагласува дека можноста за термичко преоптоварување е многу ретка, но во екстремни случаи таков дефект може да доведе до пожар. Според KBA, досега не се регистрирани материјални штети или повреди. Компанијата сама го открила проблемот и ги проверува сите возила за целосно да го елиминира секој потенцијален ризик.
