Дизелите се уште поскапи и од електричните автомобили.
Електричните автомобили се во просек околу 14.000 евра поскапи од возилата со бензински мотор, според податоците од новиот извештај на DAT за 2026 година, годишна анализа на германскиот пазар на автомобили.
Цените на новите автомобили остануваат високи со години, на незадоволство на купувачите, а разликите помеѓу погонските системи се сè уште големи. Според анкета спроведена меѓу 1.292 купувачи на нови автомобили во Германија, просечната цена на електрично возило во 2025 година била 47.160 евра, додека автомобилите со бензински мотор чинеле во просек 33.150 евра, пишува Auto Bild. Предвид е земена вистинската цена на купување, вклучувајќи ја и дополнителната опрема.
Интересно е што купувачите на дизел автомобили потрошиле уште повеќе пари - во просек 50.030 евра. Причината е што дизел моторите денес речиси исклучиво се нудат во повисоки и поскапи класи.
Според податоците на ADAC, на германскиот пазар повеќе нема ниту еден мал автомобил со дизел мотор, додека пред десет години имало дури 47.
Оптимизмот кај купувачите на електрични автомобили го носи најавата за враќање на државните субвенции до 6.000 евра, како и постојаното намалување на трошоците за производство на батерии.
Професорот Фердинанд Дуденхефер од Центарот за автомобилски истражувања (CAR) верува дека цените ќе се стабилизираат во наредните години.
Како што наведе, веќе постојат модели во кои бензинските и електричните верзии чинат речиси исто, како што е Mini Cooper, за кој во основната верзија треба да се издвојат 28.450 евра, без оглед на погонот.
Според извештајот на DAT, дополнителна причина за големите разлики во цените е однесувањето на клиентите. Иако понудата на попристапни електрични автомобили се зголемува, во 2025 година купувачите на електрични модели често избираат помоќни батерии и побогати пакети опрема.
Купувачите на бензинци, од друга страна, почесто бараа и наоѓаа возила во пониски ценовни рамки - со помалку опрема, но и по значително пониска цена.
