Во своето соопштение за францускиот пазар, групацијата Stellantis понуди продолжена гаранција до 8 години или 160.000 км на своите купувачи кои се придржуваат до распоредот за одржување во овластените сервиси на нивната официјална мрежа.
Овој потег на Stellantis засега е резервиран само за Франција, и не е познато дали и кога ќе понудат слични услови за другите пазари, иако тоа логично се очекува.
Со овој потег сакаат да ја зголемат довербата и да ги смират купувачите по аферите со Takata, големите проблеми со доверливоста на PureTech моторите, како и проблемите со BlueHDi дизел моторите. Ова продолжување на гаранцијата е бесплатно, а услов е автомобилот да се сервисира во овластена мрежа на брендот. Јасно, со ова Stellantis обезбедува повеќе сигурна и долгорочна работа за мрежата на овластени сервиси.
За пофалба е што оваа програма за гаранција ги покрива и комерцијалните и патничките возила, без разлика дали имаат мотор со внатрешно согорување, хибриден или електричен мотор.
Stellantis истакнува и две различни категории во рамките на оваа гаранција, каде за брендовите Alfa Romeo, DS и Lancia оваа гаранција се однесува и на инфотејнмент системот, нуди помош на пат и обезбедување на помошно возило, бидејќи станува збор за премиум брендови. Останатите брендови во групацијата, Abarth, Citroën, Fiat, Fiat Professional, Jeep, Peugeot и Opel имаат стандардно покритие на гаранцијата.
