Половина од авторските и издавачките права на Мајкл Џексон моментално се во процес на продажба, а неверојатната сума ќе изнесува меѓу 800 и 900 милиони американски долари.
Како што пренесуваат странските медиуми, деталите сè уште не се познати, а изворите велат дека издавачката куќа Sony и можен финансиски партнер преговараат за преземање на 50% од имотот на издавачката куќа на Џексон, приходи од снимени песни, бродвејскиот мјузикл MJ: The Musical и претстојниот биографски филм Michael.
Пакетот би бил најголемата понуда досега на пазарот на музички каталог, а цената би можело дополнително да се зголеми. Исто така, медиумите јавуваат дека издавачката куќа Primary Wave Music веќе поседува удел во издавачкиот каталог на Џексон.
Инаку, издавачката куќа Sony и нејзиниот претходник CBS го поседуваат каталогот на снимена музика за целата соло кариера на Џексон, како и за последните години од неговата кариера во семејниот бенд Џексон 5.
Тој каталог на снимена музика е еден од најпрофитабилните во историјата. Само неговиот албум „Thriller“ од 1982 година е еден од двата најпродавани албуми на сите времиња, а пејачот во текот на животот освои бројни музички награди.
