Фелипе Луис вели дека неговиот поранешен соиграч има недостаток на фудбалска амбиција, а како потврда за тоа наведе еден интересен податок.
Еден Азар го има талентот како Лео Меси, но не гаи амбиции да биде најдобар. Ова го тврди бразилскиот дефанзивец Филипе Луис кој беше соиграч со Азар во Челси.
„Еден и Нејмар се најдобрите играчи со кои некогаш со играл во ист тим - тие се добри колку Меси“, вели Филипе говорејќи за Daily Mail.
Бразилскиот лев бек со Азар настапуваше заедно само една сезона, односно 2014/15 кога тој беше дел од Челси. Азар во лондонскиот клуб настапуваше 7 сезони пред да се пресели во Реал Мадрид. Имаат играно еден против друг кога Филипе беше во Атлетико Мадрид, како и за своите репрезентации Белгија и Бразил кога играа една против друга на Мундијалот 2018 во Русија.
„Тој не тренираше добро, пет минути пред натпревар уште играше 'Mario Kart' во соблекувалната. Одеше на загревање без да си ги врзе врвките на копачите. И пак никој не можеше да му ја земе топката. Дриблаше по двајца, тројца и сам носеше победи“, раскажува Бразилецот.
Белгискиот офанзивец сега има 30 години, а во Реал наместо да се етаблира како еден од најдобрите фудбалери на светот, мака мачи со повреди и ретко игра.
„Азар има огромен талент. Веројатно му фали амбиција, да рече: 'Ќе бидам најдобриот играч на светот'. Бидејќи и може да биде“, додава тој.
Сега 35-годишниот Филипе Луис е во Фламенгу во татковината. Во Европа настапуваше уште и за Депортиво Ла Коруња и резервниот тим на Реал Мадрид на почетокот од кариерата.
