Фудбал

Азар проговори за трансферот во Мадрид: Направив одлука и го известив Челзи

13. мај 2019 - 12:29 | К.З.

Натпреварот со Лестер во последното коло од оваа сезона на Премиер лигата изгледа дека беше и последен за Еден Азар во дресот на Челзи. Белгиецот зад себе остави одлична сезона, во која го одведе тимот на Челзи до финале на Карабао купот, финале на Лига Европа и пласман помеѓу четирите најдобри екипи во Англија.

Без сомнение, Еден Азар сезонава беше најдобар играч во тимот на Челзи, кој и покрај критиките во текот на годината сепак изгледа дека ќе ја заврши оваа сезона во добро расположение.

Тој е мета на најголемите светски клубови веќе неколку години, а неговиот трансфер во Реал Мадрид постојано се дискутира низ медиумите. Како што стојат работите, прашањето не е дали тој трансфер ќе се случи, туку КОГА ќе се случи?

„Тоа што Челзи се пласираше во Лигата на шампионите нема да ја промени мојата одлука. Го известив клубот уште пред неколку недели и тоа е конечна одлука. Но, не се работи само за мене“, изјави Азар.

Со 16 постигнати голови и 15 асистенции, оваа сезона беше најдобра за Азар во Премиер лигата. Тој дури и ја освои наградата за Најдобар плејмејкер на сезоната, поради тоа што имаше повеќе асистенции од било кој друг играч во лигата. Неговото отсуство со сигурност ќе се почувствува во Челзи, посебно поради тоа што сезонава ниту еден играч не успеа да постигне двоцифрен број голови, ниту асистенции.

„Пред нас се наоѓа финале од Лига Европа, а потоа ќе видиме. Сакав да ја решиме ситуацијата досега, но тоа не се случи. Верувајте, јас чекам како што чекате вие (медиумите), како што чекаат навивачите“, додаде Азар.

Доколку Азар реши да си замине, се очекува дека Челзи ќе добие сума од преку 100 милиони фунти за белгискиот магионичар. Како што стојат работите, тој веројатно ќе заврши во Реал Мадрид, каде што постои „дупка“ во составот откако си замина Кристијано Роналдо.

Коментирај