Фудбалската репрезентација на актуелниот европски шампион Италија во иднина ќе ја гледаме со ново лого на дресовите, само пет години откако го воведоа логото кое досега го користеа.
ФИГЦ (Италијанската фудбалска федерација) го откри изгледот на новото лого кое отсега ќе ги краси дресовите и ќе биде препознатлив бренд на италијанскиот репрезентативен фудбал во сите категории.
Откако по 20 години соработка „Аѕурите“ ја сменија Puma со Adidas, добија нови дресови, продолжува ребрендирањето. ФИГЦ на јавноста ѝ го откри новото лого кое делува прилично различно од досегашното, кое да потсетиме, го воведоа пред само пет години.
Новото лого ги содржи боите на италијанското знаме вo облик слично како знакчето за Скудето кои го носи актуелниот шампион на Серија А. Новото лого е на бела позадина со зборот „Италија“ кој доаѓа до израз, обоен во сино, како дресовите со кои настапува Италија. Над амблемот се наоѓаат четирите ѕвезди кои ги претставуваат четирите освоени титули на Мундијалите на ФИФА (1934, 1938, 1982 и 2006). Новото лого е наречено Creato dale emozioni (Создадено од емоции).
Ова ново лого не е лого на Федерацијата, туку е заштитен знак на италијанските дресови. ФИГЦ има друго лого кое го воведе уште во 2021 година.
Покрај новото лого, ФИГЦ претстави и „звучен идентитет“ кој ќе ги претставува „Аѕурите“ оваа 2023 година, кога Италија ќе ги игра квалификациите за ЕУРО 2024. Звукот трае само 3 секунди, но постои и подолга верзија компонирана од Енрико Џарета и Маурицио Д'Аниело.
Италија во новите дресови и со новото лого на градите ќе дебитира во март кога во 1. коло од ЕУРО 2024 квалификациите ќе се соочи со Англија на домашен терен на „Диего Армандо Марадона“ стадионот во Неапол. Во група со Италија е и Македонија, а првиот натпревар помеѓу овие две репрезентации е закажан за 9 септември во Скопје.
