Американскиот претседател Џо Бајден ги заостри ограничувањата кон кинеските компании наводно поврзани со кинеската војска и вчера потпиша одлука со која им се забранува на Американците да купуваат или продаваат хартии од вредност на 59 кинески компании од 2 август.
Кинеската влада протестираше против овој потег уште пред да биде објавен.
Портпаролот на Министерството за надворешни работи Ванг Венбин рече дека САД ги игнорираат фактите и треба да ги „исправат грешките“ и „да престанат да им штетат на глобалниот финансиски пазар и интересите на инвеститорите“.
Новата мерка се базира на наредбата издадена од претходникот на Бајден, Доналд Трамп, во ноември со ставање на црната листа на повеќе од 50 кинески компании со наводни врски со војската.
Технологија за надзор
Наредбата на Бајден сега ги опфаќа компаниите што САД ги обвинуваат за употреба на технологија за надзор што овозможува кршење на човековите права. Во одлуката се наведува дека САД ги бранат американските инвестиции во кинески компании кои „ги поткопуваат безбедноста и демократските вредности на Соединетите држави и нивните сојузници“.
Белата куќа додава дека списокот ќе се ажурира доколку е потребно.
Министерството за одбрана повеќе нема да биде надлежно за списокот на спорни кинески компании, како во ерата на Трамп, но Министерството за финансии ќе биде надлежно за тоа.
Многу од наведените компании веќе беа погодени од претходната забрана, во која беа вклучени и производителот на мобилни телефони и интернет-опрема Huawei и третата по големина кинеска нафтена компанија CNOOC.
Наредбата на Трамп, сепак, се покажа ранлива, па кинескиот производител на смартфони Ксиаоми доби судска наредба во Вашингтон да биде избришана од списокот. Исто така, го нема ниту на новата листа на Бајден.
Трговски конфликт меѓу САД и Кина
Трговскиот конфликт меѓу Кина и САД ескалираше за време на ерата на Трамп. Неговата администрација презеде чекори против разни кинески компании.
Бајден објави ревизија на неговата политика кон Кина кога ја презеде функцијата во јануари, но јасно стави до знаење дека има намера да продолжи со цврст став кон Пекинг.
На списокот на Бајден се наоѓаат и кинеските телекомуникациски гиганти како што се China Mobile и China Unicom, како и Avic и China Aerospace Science and Technology Corporation (CASC). На списокот е и Hangzhou Hikvision, производител на технологија за видеонадзор.
