Додека на островот Бали му се заканува природна катастрофа и локалните жители стравуваат за својот живот и ги напуштаат домовите, туристите го преплавија Instagram со фотографии на кои позираат со вулканот во позадина кој би можело да експлодира во секој момент.
Вулканот Агунг повеќе од седум дена исфрла пепел и чад што создава несекојдневни драматични глетки над една од најпопуларните туристички дестинации во светот.
Повеќе од 100.000 луѓе беа евакуирани од ризичното подрачје, а чадот и пепелта кај некои од жителите предизвикаа напади на астма, па завршија во болница.
Вулканската пепел предизвика и сообраќаен колапс, па некои летови беа откажани поради што многу туристи се најдоа „заробени“ на островот.
Оние кои одлучија да останат на тропскиот рајски остров ја искористија приликата за несекојдневни селфи фотки, а некои од нив на социјалните мрежи ова го опишуваат како настан што се случува „еднаш во животот“.
Instagram е преплавен од фотографии со вулканот во позадина, а на една две трудници во бикини позираат со маски на лицата. Други пијат кафе, медитираат, прават стој на раце...
Џил Пауерс од Австралија за „Daily Mail Australia“ изјави дека отпатувала за Бали специјално за да присуствува на ерупцијата.
„Звучи глупо, но ова е на списокот со работи што сакам да ги направам во животот, да видам активен вулкан. Ова ми се чини е единствената шанса да го доќивеам тоа“, вели таа.
Последниот пат кога еруптираше вулканот Агунг, во 1963 година, загинаа 1.100 луѓе.