Трите банки кредитори на „Фени“, Стопанска банка АД Скопје, Комерцијална банка АД Скопје и банката „Силк роуд“, бараат од стечајниот управник непречен влез во фабриката заедно со заинтересирани инвеститори со кои се во преговори. Сакаат да направат увид во состојбите во фабриката, а за посетата преку писмо го известиле стечајниот управник.
„Во врска со претходната постапка поведена над имотот на должникот, друштвото „Фени индустри“ АД Кавадарци, со решение СТ бр. 111/2017 на Основниот суд Велес, ве инфомираме дека банките предлагачи на стечајната постапката стапија во преговори со заинтересирани инвеститори кои би се јавиле како санатори со цел да се продолжи работењето на должникот по отворање стечајна постапка. Со цел да не се врши непотребно одолжување на активностите, кумулирање на трошоците што банките ги авансираат за да се спречи настанување ненадоместлива штета со намалување на вредноста на имотот на должникот, како и рестартирање на работењето на должникот во најбрз можен рок, како на привремен стечаен управник определен со решение СТ бр. 111/2017 ви се обраќаме со цел без одлагање да ги обезбедите сите потребни услови за непречен увид во имотот на должникот на заинтересираните инвеститори“, стои во писмото што банките му го испратиле на стечајниот управник.
Посетата на „Фени“ е планирана во периодот од 22.11.2017 година до 29.11.2017 година.
Банките нагласуваат дека секое непостапување и одлагање на постапувањето по нивното барање нанесува штета во поглед на изнаоѓање санатори за брзо рестартирање на работењето на „Фени“ , што повлекува соодветна одговорност.
Новото рочиште за разгледување на можноста за отворање стечај за „Фени“ е закажано за 29 ноември во Основниот суд во Велес.
Банките кредитори на „Фени“ иницираа отворање стечај поради долг кон нив од 40 милиони евра и уште 20 милиони евра кон други доверители. Првото рочиште во понеделникот минатата недела беше одложено по барање на новиот директор на фабриката Рајчо Кацаров, кој во исто време е директор и на бугарски „Енекод“, заинтересиран да ја купи фабриката.
Тој побара изземање на судот во Велес за судењето да биде во некој скопски суд оти банките биле од Скопје, но Врховниот суд му го отфрли барањето и предметот повторно го врати во судот во Велес.