Ријана е прогласена за национален херој на Барбадос, во време кога земјата ја слави својата транзиција кон независна република.
„Продолжи да сјаеш како дијамант“, рече премиерката на земјата, Миа Мотли, на церемонијата посветена на поп-пејачката, модна икона и претприемач, алудирајќи на стихови од нејзиниот хит „Diamonds“ од 2012 година.
Ријана е најпознатата граѓанка на Барбадос и во 2018 година беше назначена за официјален амбасадор за култура и млади. Таа никогаш не го смекна својот бајански акцент, а нејзината музика, иако има елементи на поп, аренби и денс музиката, останува поврзана со нејзиното карипско наследство.
Мотли рече дека суперѕвездата ја поттикна „фантазијата на светот преку потрагата по извонредност со нејзината креативност, нејзината дисциплина и пред сè друго, нејзината извонредна посветеност на земјата каде е родена“.
Таа додаде: „Во име на благодарната нација, но уште погордиот народ, ви ја претставуваме амбасадорката Робин Ријана Фенти, назначена за национален херој на Барбадос“.
Ријана (33) е родена во Сент Мајкл, а израсната во главниот град Бриџтаун. Таа стана славна откако американскиот продуцент Еван Роџерс ги препозна нејзините таленти. Нејзиниот сингл „Umbrella“ од 2007 година ја потврди како една од најголемите светски поп ѕвезди.
Покрај тоа што продолжи да прави музика, Ријана има многу успешна бизнис кариера со нејзината групација компании Fenty. Во август Forbes процени дека таа вреди 1,7 милијарди долари, од кои околу 1,4 милијарди долари потекнуваат од вредноста на нејзината козметичка компанија, Fenty Beauty, партнерство со францускиот моден гигант LVMH.
Ријана се придружува на избраната група од 10 други жители на Барбадос, вклучувајќи го Гарфилд Соберс, кој се смета за еден од најголемите играчи на крикет на сите времиња и единствениот друг жив национален херој.