Капитенот на репрезентацијата на Македонија, Енис Барди, го раскина договорот со Трабзонспор и без обесштетување ќе го напушти турскиот клуб. Постои можност да се врати во Шпанија, каде претходно успешно го носеше дресот на Леванте.
Тренерот на Трабзонспор, Шенол Ѓунеш, на почетокот на ноември го исфрли Барди и уште неколку други играчи од тимот. Подоцна Барди доби дозвола да тренира со првиот тим, но беше јасно дека во зимскиот преоден рок ќе го напушти клубот.
Барди сезонава настапи на 13 натпревари за клубот од Трабзон, не постигна гол, запиша 1 асистенција, а одигра вкупно 595 минути во сите натпреварувања.
Репрезентативецот на Македонија има две недели да ги слушне понудите и да се реши каде ќе ја продолжи кариерата.
Наводно, има три понуди да се врати во Шпанија. Најсериозен интерес покажува Еспањол и според медиумите клубот од Барселона води во трката за неговиот потпис.
Интерес за Барди покажале и клубовите од Мадрид, Леганес и Рајо Ваљекано. Интересно, во овој период минатата година Барди се поврзуваше токму со Рајо Ваљекано.
