Тимот на Барселона им се врати на победите по двата кикса во серија откако синоќа славеше на гостувањето кај Виљареал.
Натпреварот почна лошо за домаќините откако уште во 3. минута Пау Франсиско Торес си постигна автогол. „Жолтата подморница“ брзо се опорави од раниот шок и во 14. минута израмни преку Жерард Морено.
Сепак, нивната радост траеше кратко откако шест минути подоцна на асистенција на Лео Меси ново водство за Каталонците донесе Луис Суарес.
На истекот од првите 45 минути одново Меси со асистенција, овој пат за Антоан Гризман кој постигна убав гол за 1:3.
Со овие две асистенции се Меси дојде до бројката од 19 сезонава, што за него е личен рекорд. Во сезоните 2010/11 и 2014/15 Аргентинецот имаше 18 асистенции по сезона.
На 4 минути пред крајот младиот Ансу Фати го постави конечниот резултат од 1:4 при што воедно тој го постигна и јубилејниот гол број 9.000 во историјата на клубот.
Со оваа победа Барса и натаму е на минус 4 од лидерот Реал Мадрид, но барем не дозволи ново зголемување на разликата.