Барселона синоќа ја совлада Осасуна со 3:0 и го задржа првото место во Ла Лига, но може да остане без трите бода доколку жалбата на гостите биде уважена.
Имено, Осасуна се подготвува да поднесе жалба бидејќи постои сомнеж дека Барселона го прекршила правилото на ФИФА за задолжителен одмор на играчите откако ќе се повлечат од националниот тим поради повреда.
Работата е во тоа што Ињиго Мартинес синоќа играше за Барселона, а според правилата на ФИФА не му беше дозволено да игра.
Играчите кои поради повреда ја напуштаат репрезентацијата не смеат да играат за клубот додека не поминат 5 дена од последниот натпревар во репрезентативниот прозорец.
Шпанија во неделата играше против Холандија во Лигата на нации, што значи дека до натпреварот Барселона - Осасуна во четвртокот поминаа четири, а не пет дена.
Мартинес на тој натпревар не настапи за Шпанија поради повреда која ја заработи на мечот против Атлетико.
„Ињиго Мартинес е повлечен од репрезентацијата на Шпанија поради повреда на коленото, која ја пријави Барселона. На негово место тренерот Луис де ла Фуенте го повика Дин Хујсен од Борнмут“, соопшти Кралската шпанска фудбалска федерација пред натпреварите на националниот тим, но од соопштението не е јасно дали Барселона во име на Мартинес побарала тој да биде ослободен од репрезентативната должност.
Жалбата на Осасуна ќе падне пред комисијата на Ла Лига само доколку Барселона покаже доказ дека Мартинес бил испратен дома од шпанскиот селектор.
Доколку играчот поднел барање да го напушти репрезентативниот камп, Барселона ќе ги загуби трите бода освоени на теренот.
