Уште неколку формалности го делат Бразилецот Нејмар од трансфер во ПСЖ, откако неговите претставници го уплатиле износот од 222 милиони евра.
„Претставниците на Нејмар лично беа во клупските простории и уплатија 222 милиони евра во негово име. На овој начин еднострано е раскинат договорот кој ги спојуваше двете страни“, соопшти фудбалскиот клуб Барселона.
Каталонскиот клуб, во соопштението, потенцира дека деталите од оваа операција ќе ги проследи во Европската фудбалска унија (УЕФА).
Претходно, челниците на Ла Лига го стопираа трансферот на Нејмар од Барселона во ПСЖ, бидејќи според нив со реализација на овој трансфер ПСЖ ги крши правилата од финансискиот ферплеј на УЕФА.
Веднаш потоа француската фудбалска лига побара од шпанската да го одобрат трансферот, односно да ја прифати откупната клаузула.
Трансферот на Нејмар ќе биде најголем во историјата на фудбалот, двојно поголем од претходниот рекорд кој минатата сезона го постави Пол Погба кога од Јувентус се пресели во Манчестер Јунајтед.