Управата на Барселона подготвила план како ова лето во своите редови да го доведе одличниот напаѓач на Атлетико Антоан Гризман, а клучна улога ќе игра португалскиот играч за врска Андре Гомеш, на кого деновите во Каталонија му се изброени.
Гомеш уште овој јануари сакаше да го напушти клубот заедно со Арда Туран, Хавиер Маскерано и Рафиња, но не успеа да го привлече вниманието на ниту една друга екипа.
На тој начин Португалецот беше присилен да остане во Барселона, која следното лето сака да го искористи како дел од договор за трансфер на Антоан Гризман од Атлетико Мадрид.
Каталонците наводно се подготвени на адреса на Атлетико да го испратат Гомеш плус 100 милиони евра во замена за одличниот француски голгетер.
За потсетување, Барселона го плати Гомеш дури 35 милиони евра, а неговата моментална вредноста на трансфер маркетот изнесува 22 милиони.
Оваа сезона забележа 21 настап во дресот на Барселона, но најчесто добива шанса од клупа и во тие натпревари забележа само една асистенција.
Нема сомнение дека Гризман би бил супер засилување за Барса, која иако го доведе Кутињо, очигледно не се откажува од желбата конкуренцијата во нападот да ја направи пеколна.