Сателитските снимки објавени од Maxar Technologies покажуваат долги колони на руската страна од границата со Грузија. Според Maxar, на снимките се гледа сообраќајна колона од околу 16 километри северно од граничниот премин и додаваат дека „сообраќајниот метеж најверојатно продолжил посеверно од фотографираната област“.
CNN претходно објави дека сликите и видеата од руско-грузискиот граничен премин што кружат на социјалните мрежи покажуваат долги редови низ планинскиот премин. Снимките со беспилотни летала од областа во понеделникот сугерираат дека стотици возила се собрани на руска страна, а очевидци велат дека луѓето чекаат до 48 часа за да преминат во Грузија.
На неколку видеа се гледаат дополнителни руски безбедносни сили како пристигнуваат на границата со оклопен транспортер.
Редици има и на преминот Верхни Ларс од Северна Осетија кон Грузија и други гранични премини откако претседателот Владимир Путин објави делумна мобилизација минатата недела.
На видеата се гледаат некои семејства и многу самци меѓу оние кои чекаат да преминат кај Веркнија Ларс. Стотици луѓе се приближуваат до преминот пеш, влечејќи куфери.
Поради ненадејниот прилив, опозицискиот политичар Нона Мамулашвили во Грузија изјави за CNN дека „ја туркаат владата да воведе визи и/или да ги затвори границите“.
Меѓутоа, во моментов, се чини дека границата е сè уште отворена.
Бројот на Руси кои влегле во Финска преку копнената граница со Русија во неделата се удвоил во споредба со претходната недела, објави финската гранична служба.
Во неделата, 8.314 Руси влегле во Финска преку финско-руската копнена граница - двојно повеќе од претходната недела, објави на Twitter Мати Питканиити, шефот за меѓународни работи на граничната полиција.
Во понеделникот вечерта Питканитити напиша дека сообраќајот на границата е сè уште зголемен и дека 80 отсто од Русите кои ја минуваат границата транзитираат во други земји од Шенген.
„Го следиме бројот на баратели на азил и илегалните преминувања на границите“, напиша тој.
Вклучувајќи ги бројките од саботата, пристигнале вкупно 16.886 Руси, а „многумина биле во транзит во други земји“, додаде тој.
Откако Кремљ најави „делумна мобилизација“, Русија забележа национални протести и егзодус на граѓани кои ја напуштаат земјата.
Минатата среда, финскиот министер за одбрана Анти Кајконен рече дека земјата внимателно ја следи ситуацијата.
Финска и Русија делат копнена граница која се протега на 1.340 километри, а има и неколку пристапни гранични премини.