Гарет Бејл, кој со два гола во финалето против Ливерпул (3:1) му ја донесе на Реал Мадрид 13-тата титула во Лигата на шампиони, прв си замина од теренот во Киев, додека неговите соиграчи уште ја славеа победата.
Според „Dalily Mail“, Велшанецот отишол во соблекувалната на Ливерпул и поминал таму 20-тина минути дружејќи се со некои од поранешните соиграчи како Адам Лалана и се обидел да ги утеши по тешкиот пораз.
На парадата со отворен автобус низ Мадрид Бејл седеше најназад и на многу снимки и фотографии е сам, што дополнително ги засили гласините дека летово ќе замине од Реал.
Велшанецот веќе подолго време не е во добри односи со Зинедин Зидан, кој денеска ја соопшти шокантната вест дека заминува од тренерската позиција во Реал Мадрид. Не се знае кој ќе го наследи Зидан, но Бејл се изјасни дека ќе замине од Реал ако не му биде дадена гаранција дека ќе игра следната сезона, имајќи предвид дека не заигра во првата 11-ка на Зидан во финалето.