По испаѓањето на Велс во групната фаза на Мундијалот, новинарите сакаа да го слушнат одговорот само на едно прашање од капитенот на таа селекција Гарет Бејл - дали е ова крај на неговата кариера во репрезентацијата?
Летово Бејл наводно размислувал да ја заврши кариерата, но реши да го напушти Реал Мадрид и да потпише за ФК Лос Анџелес и се обврза на едногодишна соработка со тимот од МЛС за да биде во форма за Светското првенство.
Велшаните освоија само еден бод на три натпревари на Мундијалот против Иран, САД и Англија, а Бејл го постигна единствениот гол за својата репрезентација во Катар.
Долго време во британските медиуми се најавуваше дека натпреварите на Светското првенство во Катар ќе бидат последни за Бејл во репрезентативниот дрес, а тој во неколку наврати даваше и одговори кои тоа го навестуваа. По завршувањето на синоќешниот дуел со Англија, новинарите го прашаа Бејл дали завршил со репрезентацијата, а тој доби изненадувачки одговор.
„Не, ова не е крај за мене. Не се збогувам со репрезентацијата, ќе продолжам да играм сè додека можам и додека ме сакаат. Секако, ова е тежок момент, но јас не се предавам Квалификациите за ЕП почнуваат во март и се надевам дека ќе играм“, изјави 33-годишниот Бејл.