Некогашниот англиски репрезентативец, Дејвид Бекам, го претстави името и грбот на својот клуб, кој од 2020 година ќе се натпреварува во МЛС лигата.
„Пред четири години сонувавме за фудбалски клуб. Денеска сме горди што го најавуваме официјалното име и грбот“, порача Англичанецот.
Клубот на Бекам официјално ќе го носи името Internacional Club de Futbol Miami, односно Интер Мајами, а на грбот доминира црната боја.
На грбот се наоѓа и римскиот број MMXX (2020), што всушност се однесува на годината кога овој клуб ќе започне да се натпреварува во МЛС лигата.
За потсетување, некогашниот англиски репрезентативец во 2014 година ја искористи опцијата од договорот со поранешниот клуб Лос Анџелес Галакси, купувајќи франшиза по намалена цена од 25 милиони долари и успеа Мајами да го доведе во МЛС лигата.
Бекам се соочи со многу проблеми при основањето на клубот, пред се поради локацијата на стадионот, но кон почетокот на оваа година доби зелено светло за да отвори фудбалски клуб во Мајами.