Кралската фудбалска федерација на Белгија го отпушти тренерот Доменико Тедеско (39) по серијата лоши резултати. Неколку недели се очекуваше дека Тедеско ќе добие отказ, особено откако не се појави на жрепката за квалификациските групи за Мундијалот 2026.

Под водство на Тедеско, Белгија едвај се пласираше во осминафиналето на минатогодишното Европско првенство, а во Лигата на нации го освои третото место со само една победа во шесте натпревари. Овие резултати се во целосна спротивност со оние на почетокот на неговиот мандат, кога имаше серија од 13 натпревари без пораз.
Резултатскиот пад на белгиската репрезентација започна по судирот на Тедеско со првиот голман Тибо Куртоа, поради што голманот на Реал Мадрид одлучи дека повеќе нема да брани за националниот тим. Главен кандидат за наследник на Тедеско е Тјери Анри, кој му беше помошник на поранешниот тренер Роберто Мартинес.
Белгија е противник на Македонија во мундијалските квалификации. Во групата Ј покрај Белгија и Македонија се и Казахстан, Велс и Лихтенштајн. Македонија против Белгија игра на 6 јуни во Скопје, а вториот дуел е на 10 октомври во Белгија.