Уличниот уметник Бенкси преку неговиот Instagram профил потврди дека стои зад мистериозното дело што завчера се појави во Јужен Велс.
Имаше сомненија, по појавувањето на муралот во Порт Талбот, дека Бенкси го посетил тоа место и дека специфичното уметничко дело е негово, а сега мистериозниот уметник и сам го потврди тоа.
На муралот што се појави во индустриската област, е претставено дете како си игра со нешто што личи на снег, но кога ќе погледнете од друг агол ви станува јасно дека детето си игра во чад и пепел од оган.
Градежните објекти и автомобилите во оваа област во јули беа покриени со црна прашина од градската челичарница, што се претпоставува дека го инспирирало Бенкси да го нацрта муралот.
Скот Бемси од Градскиот совет за CNN изјави дека го поздравува делото.
„Отидов да го видам уметничкото дело и иако не сум стручњак за графити, изгледа како добро завршена работа и постои голема веројатност делото да е на Бенкси“, изјави тој пред уличниот уметник да преземе одговорност за муралот.