Од кого да очекуваме некоја досега невидена лудост, ако не од Русите? На група автомобилски ентузијасти импресионирани од тенкови им падна на ум идејата да направат возило по нивна мера, па зедоа еден Bentley Continental GT и тенковски „гасеници“ и се фрлија на работа.
Проектот, на прв поглед бизарен, сепак е успешен и на оваа руска група треба да ѝ се честита затоа што крајниот резултат изгледа фантастично.
Возилото беше наречено Bentley Ultratank, што се чини како совршено име за овој хибрид од ултраскап автомобил и воено возило. Оваа луксузна ѕверка не само што не познава граници и препреки, туку има и одличен звук кој ќе го разбуди љубителот на автомобили во сите од вас.
Проектот и понатаму не е завршен бидејќи има одредени мали проблеми, како на пример тоа што „гасениците“ понекогаш паѓаат при нагло свртување. Во таков случај следува долг и напорен процес на враќање на гасениците на главното тело на возилото – проблем кој бара адекватно решение.
Исто така, Русите кои го направија овој луксузен тенк рекоа дека ќе продолжат да работат на брзината на нивниот Ultratank, бидејќи тие сакаат тој да достигнува брзина од 100 км/ч, а во моментов тој може да вози со максимални 50 км/ч. Сепак, тие велат дека тоа не е голем предизвик и би требало да биде решен набрзо.
Останатите проблеми се „мали“, велат од групата. Поради тоа што автомобилот нема врати, прашината често му прави проблем на возачот, а малку поголем проблем е тоа што кочницата и понатаму не е функционална.
