Карим Бензема изјави дека никогаш повеќе нема да настапува за Франција. Откако поради повреда го пропушти Светското првенство во Катар и по бројните наводи дека е скаран со Дидје Дешан, напаѓачот на својот 35 роденден одлучи никогаш повеќе да не игра за француската репрезентација.
Бензема поради повреда отпадна од листата, но закрепна до нокаут-фазата. Но, и покрај тоа, Дешан не го повика во Катар. По овој потег, Бензема, кој минатата година по 6 години се врати во репрезентацијата, одлучи да се збогува.
Напаѓачот на Реал Мадрид е непожелен за повеќето играчи, а францускиот новинар Ромен Молина откри дека неколку фудбалери се израдувале што Бензема го напушта репрезентативниот камп во Доха.
Дешан му наредил на докторот да го избрка Бензема
Како што минува времето, се појавуваат се повеќе детали за токсичната атмосфера во кампот на француската репрезентација додека во неа беше Бензема. Вечерта кога и официјално е соопштено дека Бензема е повреден, во неговата соба влегле Дешан и докторот Франк Ле Гал. Токму докторот на репрезентацијата добил задача да му каже на Бензема да го напушти кампот.
„Жал ми е Карим, но мора да си заминеш“ е реченицата што Ле Гал ја изговорил, а Дешан ништо не кажал.
Бензема не сакал да направи сцена, мирно се спакувал и заминал за Мадрид. По неколку дена докторот му се јавил и му кажал дека добил наредба од Дешан да го отстрани од екипата.
Потоа Бензема одбил каков било контакт со селекторот и екипата, па го одбил и повикот на претседателот Макрон да присуствува на финалето меѓу Франција и Аргентина.