Бугарската легенда призна дека не му е сеедно гледајќи како Ливерпул доминира во Премиер лигата на сметка на неговите поранешни клубови.
Димитар Бербатов беше гостин на Sport Klub каде заедно со поранешниот шведски фудбалер Бојан Џорџиќ разговараше пред натпреварот помеѓу Тотенхем и Ливерпул. Како што се гледа на видеото, тој изненади со неговиот српски.
„Манчестер Јунајтед 7 години нема титула во Премиер лигата, а тоа е многу. Ако продолжи вака ќе стане како Ливерпул кој чека 30 години. Тоа не би било добро за никој. Ливерпул лани ја освои Лигата на шампионите, а оваа година според мене ќе ја освои и Премиер лигата. Јас потоа ќе престанам да гледам, не можам да гледам како Ливерпул доминира, срце ме боли. Но, мора да се каже дека играат одлично“, рече Бербатов.
Поранешниот бугарски репрезентативец кариерата ја почна во ЦСКА од каде во 2001 се пресели во Баер Леверкузен каде за 6 сезони постигна 91 гол.
Наредните 8 сезони ги мина на Островот. Почна со Тотенхем играјќи од 2006 до 2008 кога се пресели во Манчестер Јунајтед каде се задржа најмногу, до 2012. Во наредните сезона и пол го носеше дресот на Фулам пред да замине во Монако на почетокот од 2014. Кариерата ја заврши во 2018 во индискиот тим Керала Бластерс.
