Поранешниот албански претседател и премиер Сали Бериша коментирајќи го грабежот на 10 милиони евра на меѓународниот аеродром во Тирана, обвини дека станува збор за предизборна кражба, организирана од самата држава.
– Ова е предизборна кражба, организирана од одредени сегменти на државата. Со идентично сценарио од 2016 година. Со државен банкрот. Со извонредна прецизност што може да се постигне со учество на аеродромските безбедносни елементи од Управата за цивилна воздушна пловидба. Тоа е сценарио на државата. Нема криминалци во светот кои може да организираат идентично сценарио по вторпат, обвини Бериша во гостување на тиранската телевизија Ора њуз.
Тој смета дека во врска со грабежот нема да биде уапсено ниту едно лице, туку дека државата ќе исценира некој сторител, кому ќе му даде 100.000 евра и ќе го осуди на две години затвор, па ќе го ослободи.
Групата разбојници, чиј точен број уште е предмет на шпекулации, влетала на пистата и со ПП апарат го скршила предното стакло на блиндираното возило на банка од Тирана и потоа ги грабнала вреќите со пари.
Веднаш во потрага се вклучиле припадниците на единицата за брза интервенција РЕНЕА. Недалеку од аеродромот, во спореден пат разбојниците биле забележани по што отвориле оган кон полицијата. Во меѓусебната престрелка убиен е еден од разбојниците. Останатите разбојници успеале да ѝ избегаат на полицијата.
Во потрагата се вклучени и дополнителни полициски сили од Драч, Лежа, Пешкопеја, припадниците на специјалната единица „Ренеа”, како и еден хеликоптер. Албанската војска вчера ја презеде контролата врз аеродромот во Тирана.
