Се очекува следниот месец да биде донесена одлука дали главниот град на Германија ќе стане град без автомобили.
Граѓанската иницијатива Berlin Autofrei (Берлин без автомобили) лани предложи план за ограничување на автомобилите во рамките на S-Ringban (кружна железничка линија околу внатрешноста на градот), чија цел ќе биде да се добие најголемата област без автомобили на светот. Ако биде усвоен предлогот, ќе биде опфатена површина од 88 квадратни километри, oбјави Der Tagesspiegel.
Целта на иницијативата Berlin Autofrei е да се забрани користење на приватните автомобили во центарот на Берлин, а таму ќе смеат да се движат само возила на итните служби, камионите на јавното комунално претпријатие, такси возила, возила за достава. Специјална дозвола за движење со возило во оваа зона би добиле и жителите со ограничена мобилност.
„Целта на кампањата е да се осигура јавните улици на Берлин да бидат правично распределени, здрави, безбедни, погодни за живеење и еколошки. Бидејќи градските власти сè уште не презеле активности и мерки за да се остварат овие квалитети, моравме да ги искористиме нашите демократски алатки“, велат од Berlin Autofrei.
Досега тимот има собрано над 50.000 потписи за поддршка на кампањата, па што берлинскиот Сенат мора да ја разгледа идејата, а дали ќе ја прифати и претвори во закон, ќе биде решено следниот месец. Ако иницијативата биде одбиена, групата најави дека ќе се обиде да собере 175.000 потписи, со што за идејата Берлин без автомобили ќе можат да гласаат сите жители во 2023.
На оваа вест реагираа од НА ТОЧАК, група ентузијасти со цел подобро велосипедско Скопје.
„За споредба, површината на урбаниот дел од Скопје изнесува 88 квадратни километри, а површината на единствената зона која се планираше да стане пешачка - Мал Ринг (зоната меѓу булевар „Гоце Делчев“, ул. „Филип II Македонски“ и ул. „Даме Груев“) изнесува само 0,55 квадратни километри“, напишаа тие на Facebook.
„Се разбира дека за да се размислува за зони со минимална употреба на автомобили, еден град треба да има развиен јавен превоз и развиена велосипедска мрежа. И се разбира дека натака треба да се движиме во приоритетите“, се вели понатаму во објавата.
Лошите практики како алфалтирање на автоцентрични улици, без специјални ленти за јавен превоз, без велосипедски патеки и со окупирани тротоари, плоштади и паркови со автомобили, преголемата употреба и присуство на автомобили во градовите ги прави неквалитетни за живеење, велат од НА ТОЧАК и додаваат дека квалитетот на живот во градовите не се подигнува со давање уште повеќе простор за автомобилите, со поплочување зелени површини за паркинг плус.
„Квалитетот на живот во градовите се подигнува со одземање привилегии на автомобилите и создавање простор за луѓето“, велат тие и апелираат да се следат позитивните тенденции, како иницијативата за Берлин.
