Колку политички интервјуа завршиле со ракување? Сигурно сите. Но само на интервју со Силвио Берлускони на крај ќе добиете совет за вашиот личен живот.
Поранешниот италијански премиер кој прави стратешки потези за враќање на политичката сцена, ѝ даде совет на новинарка на BBC што младата жена не го побара.
Откако се ракуваше со неа, Берлускони ѝ рече: „Не стискај толку кога се поздравуваш. Инаку мажот ќе си помисли ‘Оваа ќе ме истепа’ и така никој нема да сака да се ожени со тебе.“
Разговорот не заврши тука.
„Омажена си? Не? Ете гледаш!“, продолжува Берлускони, а новинарката му вели „Нели цврст стисок при поздравување е добра одлика?“
На тоа Берлускони ѝ одговори:
„Не стискај толку многу. Кој ќе те ожени вака? Се шегувам, мора да се пошегуваме одвреме-навреме.“
Берлускони има забрана за вршење јавна функција откако беше осуден за даночна измама, но тоа не го спречува во обидите да се врати во политичката елита во Италија.
