Поранешниот прв човек на Формула 1, 91-годишниот Берни Еклстоун, е уапсен во средата вечер во Бразил поради нелегално поседување оружје додека се качувал во приватен авион на лет за Швајцарија, соопшти денеска бразилската полиција.
Во багажот на Еклстоун полицијата пронашла пиштол за кој долгогодишниот шеф на Формула 1 не поседувал документи.
Еклстоун ѝ признал на полицијата дека поседува пиштол, но додал оти не знаел дека оружјето се наоѓа во неговиот багаж.
Локалните медиуми јавија дека Еклстоун е пуштен на слобода, откако платил кауција.
Еклстоун престојуваше неколку недели во Бразил при што имаше состанок и со трикратниот светски првак во Ф1, Нелсон Пике.