По сезоната во која не одигра ниту еден натпревар и заработи 44,3 милиони долари, Џон Вол ја активираше опцијата за игра во договорот со Хјустон Рокитс и следната сезона ќе заработи 47,3 милиони долари.
Минатата година Вол имаше втора најголема заработка во НБА лигата, помала само од Стеф Кари, а неговиот договор гарантира дека следната сезона ќе биде вториот најплатен играч во лигата. Кари ќе заработува 48 милиони долари.
Рокитс минатата сезона решија да не го користат, туку да развиваат млади играчи наместо скапиот ветеран, и сигурно ќе се обидат да се ослободат од него пред почетокот на следната. Дури и ако не успеат да го направат тоа, Вол нема намера да се откаже од богатството што Рокитс треба да му го платат.
Франшизата од Хјустон ја презеде таа одговорност во 2020 година кога го донесе од Вашингтон Визардс во замена за Расел Вестбрук. Вол, првиот избор на драфтот во 2010 година, одигра само 113 од можни 390 натпревари од 2017 година. Во кариерата има просек од 19,1 поен и 9,1 асистенции по натпревар.
