Македонската женска репрезентација в петок го пречекува Косово во првиот натпреварб од новата сезона во Лигата на нации на УЕФА, а ФФМ донесе паметна одлука - влезот да биде бесплатен за љубителите на фудбалот.
В петок од 14:00 часот на еден од терените на Тренинг-центарот „Петар Милошевски“ во Ново Лисиче репрезентацијата на Македонија ќе ги пречека фудбалерките на Косово со надеж дека новата сезона во Лигата на нации - Лица Ц ќе ја отвори со победа.
Денеска Управниот одбор на ФФМ донесе одлука да не се наплаќа влез, туку влезот да биде бесплатен за што повеќе љубители на фудбалот да дојдат на стадион и да им дадат поддршка на девојките.
Одличен и паметен потег на ФФМ, со оглед на тоа што потребна е популаризација на женскиот фудбал во државава, а секако касата на ФФМ нема да се збогати со продадени едвај стотина билети, колку што беше посетата досега кога старото раководство продаваше карти за женски фудбал.
На фудбалерките и тоа како ќе им биде потребна што поголема поддршка, со оглед на фактот што капитенката и нашпа најдобра фудбалерка, Наташа Андонова, поради повреда нема да биде во комбинација. Селекторот Александар Андов во понеделникот го објави составот. Правдата ќе ја дели Емили Торкелсен од Норвешка.
Воедно, влезница нема да се наплаќа ниту за натпреварите на женската репрезентација до 19 години за натпреварите против Босна и Херцеговина на 23 и 25 март.
