Колачите во кои се користат бисквити како основа се многу практични, а во исто време се и многу вкусни. Затоа, доколку сте љубители на јаболка, задолжително пробајте го овој едноставен десерт.
Рецептот го најдовме на Instagram профилот на фудблогерката Наталија Милодановиќ, која за оваа торта користела тавче од 30х20 сантиметри.
Потребни состојки:
- 300 гр бисквити
- 700 гр рендани јаболка
- сок од половина лимон
- 500 мл вода
- 6 лажици шеќер
- 1 кесичка ванилин шеќер
- 2 пудинга од ванила
- 1 лажичка цимет
- шлаг и млеко/вода (или слатка павлака за шлаг)
- цимет
Подготовка:
Измијте, излупете и изрендајте ги јаболката. Треба да имате приближно 700 гр рендани јаболка. Ставете ги во тавче и прелијте со 300 мл вода, сок од половина лимон, кесичка ванилин шеќер и обичен шеќер. Гответе околу 10 минути на средна температура за малку да омекнат јаболката.
Во 200 мл вода измешајте го пудингот од ванила и варете заедно со јаболката. Вратете на шпорет и варете уште неколку минути за да се згусне пудингот. На крајот измешајте го циметот. Оставете ја смесата некое време да се излади.
Во тавче или калап ставете ред бисквити, па ставете половина од смесата од јаболка и пудинг и израмнете. Повторно наредете ред бисквити и премачкајте го остатокот од смесата. Оставете го колачот да се излади на собна температура, а потоа ставете го во фрижидер. Подоцна изматете го шлагот со млеко/вода или едноставно изматете ја слатката павлака и премачкајте над изладениот колач.
На крајот украсете со цимет.
