Познатата пејачка Биби Рекса, која по потекло е од Албанија, предизвика бројни реакции со пораката што ја напиша на социјалните мрежи.
Најпрво напиша дека по 12 години го посетила родниот град на татко ѝ, Дебар во Македонија.
„Повторното поврзување со моите корени и семејството беше длабоко емотивно. Посетата на гробот на дедо ми беше особено значајна, бидејќи не можев да присуствувам на неговиот погреб поради турнејата“, наведе Рекса.
Таа додаде дека семејството ѝ значи сè и дека оваа посета ја потсетила на важноста од одржување на врските.
„Албанија, Косово, Македонија, Црна Гора, Прешево, за мене сè е моја Албанија“, напиша таа во коментарот.
Многу следбеници ја критикуваа за споменатиот коментар.
„Треба да научиш каде е родната куќа на татко ти и да сфатиш колку е навредливо да се каже дека ова сè е твоја Албанија. Исто така, твојата музика не е добра. Имаше една добра песна одамна. Фотографирање на гроб за Instagram не е убаво, Биби.“ „Дебар е град во Македонија и никогаш нема да биде Албанија! Засрами се!“, „Има толку многу книги за историја и географија што можеш да ги купиш и да ги прочиташ“, се некои од коментарите.
Биби Рекса уште не одговорила на критиките. Таа и претходно истакна дека е горда на своето потекло. Во едно од претходните интервјуа таа се пошегува дека има нешто посебно во албанската вода.
„Ние сме силни и можеме да се соочиме со многу тешкотии. Мајка ми и татко ми работеа напорно и никогаш не ми кажаа дека сме во тешка ситуација“, рече таа.
