Основачот на компанијата Microsoft, милијардерот Бил Гејтс, во неговиот говор на конференцијата TED во 2015 година предупреди дека светот не е подготвен да се справи со епидемија или пандемија.
„Во 2014 година светот успеа да одбегне ужасна пандемија на ебола, благодарение на илјадници несебични здравствени работници, но, да бидеме искрени, и на огромна среќа. Гледано ретроспективно, знаеме дека можевме да постапиме подобро“, рече тој.
Гејтс тогаш додаде дека мора да се стават сите добри идеи во пракса ако сакаме да бидеме подготвени да се соочиме со следната епидемија или пандемија.
Тој предложи планирање на вакцини и обука за здравствените работници, токму она што најмногу недостига во начинот на кој светот се справува со епидемијата на новиот корона вирус во моментов, особено во Кина, од каде почна ширењето на болеста.
Бил Гејтс пред две години повторно потсети дека државите во светот треба да се подготват за „пандемијата што му претстои на светот, и тоа на ист начин како што би се подготвувале за војна“.
Тој тогаш рече дека смртоносна пандемија ќе ја погоди нашата планета во нареднава деценија и дека смртоносна болест ќе убие повеќе од 30 милиони луѓе за неколку месеци, најмногу шест.
Ова апокалиптично предупредување Гејтс го изнесе во април, 2018 година на научен собир во Масачусетс, а на оваа тема зборувал и претходно, само со помала убеденост во неговите тврдења.
Напоменувајќи дека „обично е оптимист“, Гејтс тогаш рече:
„Има една област во која светот не прави доволно за да постигне напредок, а тоа е подготвеност за избивање на пандемија“, рече тој.