Песната „Blinding Lights“ во изведба на The Weeknd моментално е на врвот на листата на 100 најдобри песни на сите времиња на Billboard.
Музичарот објави видео за оваа песна на почетокот на 2020 година, а досега е прегледано повеќе од 500 милиони пати на YouTube. Само два месеци по објавувањето на песната, таа се најде во Billboard листата на топ 100 песни.
„Мислам дека сè уште не сум ни свесен за ова. Се трудам да не размислувам толку многу за тоа. Само ги ценам вашите благослови и благодарен сум“, изјави The Weeknd за странските медиуми.
Музичарот беше пофален од Монте Липман, извршен директор на Republic Records.
„Уште кога го запознав Абел, ми беше јасно дека тој е предодреден за светска слава. Blinding Lights стана една од оние песни кои допираат до емоциите на луѓето ширум светот“, рече тој.
На второто место на Billboard листата на топ 100 песни на сите времиња се најде песната „The Twist“ на пејачот Чаби Чекер. Во топ 10 на листата се најдоа и песните „Smooth“ (Santana feat. Rob Thomas), „Mack the Knife“ (Боби Дарин), „Uptown Funk“ (Mark Ronson feat. Bruno Mars), „How Do I Live“ (LeAnn Rimes), „Party Rock Anthem“ (LMFAO со Лорен Бенет и ГунРок), „I Gotta Feeling“ (The Black Eyed Peas), „Macarena“ (Bayside Boys Mix), „Shape of You“ (Ед Ширан).
Кој е The Weeknd?
The Weeknd, чие вистинско име е Абел Маконен Тесфаје, е канадски пејач, текстописец и продуцент. Кариерата ја започна во 2008 година и моментално е еден од најпопуларните и најуспешните артисти.
Во 2013 година го издаде својот прв студиски албум „Kiss Land“. Неговиот втор албум, „Beauty Behind the Madness“, стана неговиот прв албум број еден на Billboard 200 листата.
Во септември 2016 година, тој го издаде својот трет албум „Starboy“, кој го издаде истовремено со објавувањето на синглот „Starboy“, кој исто така достигна број еден на Billboard Hot 100 листата. Во март 2020 година, тој го издаде својот четврти студиски албум „After Hours“.
The Weeknd настапи на Супербоул на почетокот на 2021 година. Во придружба на танчери, тој изведе голем број негови хитови, меѓу кои и песната „Blinding Lights“. Пејачот не сакаше да биде платен од организаторите на Супербоул за неговиот настап и вложил свои седум милиони американски долари во настапот.
„Пејачите се спремни да настапуваат бесплатно, па дури и да ги субвенционираат трошоците за продукцијата преку нивната издавачка куќа или промотор на концерти. Дури и најголемите имиња мора постојано да се промовираат. Шоуто на полувремето на Супербоул е идеална можност за тоа“, рече тогаш Марк Ганис од консултантската фирма Sportscorp, објаснувајќи ја ваквата одлука.